1 Timothy 1
1 𠊎係保羅；𠊎奉𠊎等个救主上帝㧯𠊎等个盼望基督耶穌个命令，做基督耶穌个使徒。
2 𠊎寫信仔給你—提摩太，就係𠊎在信仰底背真个孻仔：願阿爸上帝㧯𠊎等个主基督耶穌賜恩典、憐憫、平安給你！
3 𠊎愛去馬其頓个時，識喊你留在以弗所；𠊎希望你繼續恁樣做。因為有兜人在該位傳假个教義，你定著愛命令佢等停下來。
4 你也愛命令佢等，愛放掉該兜無影無跡个傳說㧯無窮無盡个族譜；因為這兜東西會惹起辯論定定，對了解上帝个計劃全無幫助。上帝个計劃愛通過信心正會了解。
5 這命令个目的係愛激勵愛心；愛心係對純潔个心、清白个天良，㧯真實个信心所產生出來个。
6 有兜人偏離這兜，迷失在虛空个談論底背。
7 佢等想愛做上帝法律个指導者，總係，連自家所講个也無明白，連自家恁自信所主張个也無清楚。
8 𠊎等知，人若係照規矩來使用法律，法律本來係好个。
9 當然，𠊎等愛知：法律毋係為好人來制定个，係為該兜不法㧯毋受約束个、毋敬虔㧯犯罪个、藐視宗教㧯貪愛世俗个、㓾爺殺哀㧯謀殺个、
10 淫亂、男同性戀、販賣人口、講花撩、做假見證、違悖健全教訓等類个人。
11 這健全个教義係根據福音，就係榮光、堪得稱頌个上帝交託𠊎宣佈个。
12 𠊎感謝賜𠊎力量个—𠊎等个主基督耶穌！因為佢看𠊎做忠心，指派𠊎來事奉佢。
13 雖然𠊎頭擺譭謗佢，迫害佢，又侮辱佢，總係𠊎得到憐憫；因為該時𠊎毋信佢，毋明白自家所做个。
14 𠊎等个主賜𠊎豐盛个恩典，俾𠊎得到同基督耶穌結連个人正有个信心㧯愛心。
15 「基督耶穌降世个目的係愛拯救罪人」，這句話係真實个、堪得完全接受。𠊎係罪人中第一壞个；
16 總係，這就係上帝憐憫𠊎个原因，愛使基督耶穌對𠊎這罪人中最壞个，顯出佢完全个忍耐，來使該兜後來信佢、接受永生个人做榜樣。
17 願尊貴㧯榮光永遠歸給該萬世个君王，就係毋會朽爛、人看毋到、獨一無二个上帝！阿愐。
18 𠊎个孻仔提摩太啊，照頭擺所傳關係你个預言，𠊎將這個命令交託你。你愛用這兜話做武器，來打一場盡靚个戰爭。
19 愛堅持信仰㧯清白个天良。有兜人棄絕自家个天良，佢等个信仰就像船仔沈掉。
20 其中有許米乃㧯亞歷山大；𠊎已經將佢等交在撒但个手中，愛俾佢等學會毋敢再譭謗上帝。